Skírnarskraut! Barn búið til í silíkonmóti

 

Það er ótrúlega auðvelt að búa til sykurmassaskraut með hjálp silíkonmótanna! Mótin þola allt frá -60°C til +230°C og það festist ekkert við þau. Það þarf að frysta massann í mótinu til þess að ná barninu úr því án þess að það afmótist. Hér sjáið þið hvernig silíkonmótin eru notuð fyrir gum paste / sykurmassa.

 

Ef það á að geyma barnið í lengri tíma er ráðlagt að nota gum paste í stað sykurmassa.

 

Til þess að búa til barn í silíkonmótunum þarftu eftirfarandi: Barnamót, gum paste (hægt að nota sykurmassa), kopar húðlit og súkkulaði brúnan matarlit. Notið bleika duftlitinn og pensillinn til þess að setja roða í andlit barnsins og bleika og bláa matarlitinn til að gera skraut á skírnarkjólinn. Ég sýni hvernig kjóllinn er mótaður og settur á barnið síðar ; )

 

Þessir litir eru notaðir til þess að lita sykurmassa í húðlit. Það er hægt að ná öllum húðlitum með aðeins tveimur litum. Best er að nota koparlitinn sem grunn og bæta brúnum saman við þar til liturinn er eins og við viljum hafa hann.

 

Passið að hafa nægilegt magn af gum paste til þess að fylla mótið. Gerið frekar aðeins meira en minna.

 

Byrjið á því að setja lítið magn af koparlit í massann. Hnoðið vel til þess að lita sykurmassann.

 

Blandið meiri koparlit í massann ef þess þarf og blandið vel saman.

 

Bætið því næst súkkulaði brúnum lit saman við þar til þið eruð ánægð með litinn. Hnoðið vel saman þar til engin skil eru í sykurmassanum.

 

Búið til sívalning úr massanum og hafið hliðina sem fer ofan í mótið slétta. Það er ágætt að hnoða kúluna með örlitlu palmíni til þess að ná henni alveg sléttri.

 

Setjið slétta hlutann niður að mótinu og þrýstið massanum ofan í mótið.

 

Þrýstið vel með fingrunum til þess að sykurmassinn fari örugglega í öll smáatriði mótsins.

 

Skafið umfram sykurmassa í burtu.

 

Sléttið botn barnsins með fingrunum. Hér er líka gott að nota svolítið palmín.

 

Setjið mótið í frysti í um klukkustund, eða þar til sykurmassinn er orðinn alveg harður.

 

Flettið mótinu utan af barninu.

 

Barnið losnar mjög auðveldlega á meðan það er frosið.

Ég mun svo fljótlega sýna hvernig barnið er klætt í skírnarkjól!

Það er langbest að setja öll silíkonmótin í frysti áður en massinn er tekinn úr þeim. Hins vegar er hægt að losa einfalda hluti eins og skeljar úr mótinu strax án þess að frysta það. Það gefur þó besta raun að setja þau í frysti. Þegar sykurmassinn er tekinn úr mótinu myndast örlítið hrím utan á sykurmassanum. Ekki hafa áhyggjur af því, það lagast fljótt ef hlutirnir eru látnir anda (ekki setja þá í lokuð ílát á meðan þeir þorna aðeins).