Helga Jónsdóttir sendi okkur hlekk á þetta frábæra myndband á YouTube. Lærið að búa til Cake Pops á nokkrum mínútum! Þið finnið uppskriftina og aðferðina frá Helgu fyrir neðan myndbandið.
Uppskrift og leiðbeiningar frá Helgu:
Cake pops (kökur á sleikjópinnum)
Bakið súkkulaðiköku, má vera Betty Crocker eða eitthvað annað pakkadeig. T.d. er mjög gott pakkadeigið sem er selt í Nóatúni á 299 krónur.
Látið kökuna kólna alveg. Bakið helst daginn áður en á að búa til pinnana. Myljið kökuna vel niður og hrærið kremi saman við hana. Ef notað er hvíta kremið frá Betty Crocker þá er það ca ¾ úr dósinni sem er hrært saman við einfalda uppskrift. Einnig hægt að blanda saman við þetta súkkulaðismjörinu Nutella eða hvaða bragði sem maður vill. Kremið er hnoðað saman við deigið þar til það blandast allt vel saman. Þá eru mótaðar kúlur (ég vigtaði þetta til að fá allar kúlurnar jafnar og setti um 25 grömm í hverja kúlu). Þegar búið er að móta kúlurnar þá er þetta sett inn í frysti í um 15 mínútur eða í ísskáp og þá a.m.k í klukkustund.
Svo er hægt að bræða hvaða súkkulaði sem maður vill og setja utan um kökurnar og dýfa svo í skrautsykur eða kókosmjöl eða hvað sem er. Ef engin prik eru notuð kallast kúlurnar Cake Balls. Ef kúlurnar eru settar á prik er talað um Cake Pops.
Best er að byrja á að stinga pinnanum sjálfum í súkkulaðið og svo inn í miðja köku (gott að klára allar kökurnar svoleiðis áður en byrjað er að dýfa kökunum ofan í). Síðan er best að nota prikin til að halda í þegar dýft er ofan í súkkulaðið. Mjög einföld og flott lausn í t.d. barnaafmæli ef maður vill gera eitthvað svona öðruvísi.
Þegar súkkulaðið er sett á þá þarf helst að nota eitthvað til að halda prikunum uppréttum svo súkkulaðið verði fallegt. Ég notaði gamla hillu sem ég boraði göt í til að stinga pinnunum þegar ég var búin að setja súkkulaðið.